ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានលើកឡើងថា ផ្លូវនៅភ្នំពេញមិនអាចពង្រីកបានទៀតទេ ព្រោះតែកំណើនប្រជាជនខណៈបច្ចុប្បន្ននៅភ្នំពេញមានប្រជាជនសរុបជាង ៣លាននាក់។ តែយ៉ាងណារាជរដ្ឋាភិបាលនឹងបន្តខិតខំបង្កើនមធ្យោបាយដឹកជញ្ជូន តាមរយៈការបន្ថែមសេវារថយន្តក្រុង គម្រោងផ្លូវក្រោមដី និងរទេះភ្លើងលើអាកាសជាដើម។
សម្តេចធិបតីថ្លែងនៅក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ ពីចាក់អង្រែក្រោម-ព្រែកប្រានាព្រឹកថ្ងៃទី១៩ ខែកុម្ភៈ ឆ្នាំ២០២៤ ដូច្នេះថា៖ «ផ្លូវពង្រីកលែងបានហើយ ជាពិសេសនៅតំបន់ក្រុងរបស់យើង (ភ្នំពេញ) ពង្រីកលែងបានហើយ អស់ចិញ្ចើមផ្លូវហើយ កន្លែងដែលត្រូវពង្រីក ពង្រីកអស់ហើយ ត្រូវសិក្សាអំពីវិធីបង្កើនសមត្ថភាពមធ្យោបាយដឹកជញ្ជូនសាធារណៈ ធ្វើម៉េចដើរឱ្យច្រើន»។
បើតាមសម្តេចធិបតី កម្ពុជាក៏កំពុងសិក្សាផ្លូវក្រោមដី ដោយមានជាផ្សារទំនើបៗ និងគម្រោងផ្លូវអាកាស ដូចនឹងប្រទេសជឿនលឿនផងដែរ ដោយសម្តេចធិបតីក៏បានជជែកអំពីគម្រោងនេះជាមួយក្រុមហ៊ុនចិន។
សម្តេចធិបតីលើកឡើងថា៖ «ប្រជាជនកាន់តែច្រើន ជីវភាពរស់នៅកាន់តែសម្បូរបែប មធ្យោបាយកាន់តែមានច្រើន យើងគ្មានជម្រើសលើកទីក្រុងទីណាទេ»។
សម្តេចនាយករដ្ឋមន្ត្រីអះអាងថា គម្រោងផ្លូវក្រោមដី ស្ពាន ផ្លូវថ្នល់ នៅថ្ងៃអនាគតនឹងជាស្នាដៃរបស់វិស្វករកូនខ្មែរ ដែលនេះជាមហិច្ឆតាដែលកម្ពុជាចង់បាន។
សម្តេចធិបតីគូសបញ្ជាក់ផងដែរថា រាជរដ្ឋាភិបាលក្នុងអណត្តិទី៧ នេះចាត់ទុកការងារកសាងហេដ្ឋារចនាសម្ព័ន្ធ ស្ពាន ផ្លូវថ្នល់ ជាអាទិភាពទី២ បន្ទាប់ពីការកសាងធនធានមនុស្ស៕
